குழந்தைகளுக்கு மூளையைப் பாதிக்கும் காசநோய்! – ஆரம்பத்திலேயே கண்டறிவது அவசியம்!

காசநோய் பொதுவாக நுரையீரலைப் பாதிக்கும் நோயாக அறியப்பட்டாலும், அது மூளை மற்றும் மத்திய நரம்பு மண்டலத்தையும் பாதிக்கக்கூடும். குறிப்பாக குழந்தைகளுக்கு ஏற்படும் மூளை காசநோயை (Brain TB) ஆரம்பத்திலேயே கண்டறிந்து சிகிச்சை அளிக்காவிட்டால், நிரந்தர நரம்பியல் பாதிப்புகள் ஏற்பட வாய்ப்புள்ளதாக மருத்துவர்கள் எச்சரிக்கின்றனர்.

இதுகுறித்து கைலாஷ் மருத்துவமனையின் நரம்பியல் நிபுணர் டாக்டர் சுலக்ஷனா தஹியா கூறுகையில், குழந்தைகளுக்கு ஏற்படும் மத்திய நரம்பு மண்டல காசநோயில் மூளைக்காய்ச்சல் மற்றும் மூளையில் காசநோய் கட்டிகள் போன்ற பாதிப்புகள் ஏற்படலாம் எனத் தெரிவித்துள்ளார்.

தொடர்ந்து தலைவலி, வாந்தி, காய்ச்சல், அதிக தூக்கம், எரிச்சல், நடத்தை மாற்றம், வலிப்பு, கை அல்லது கால்களில் பலவீனம், நடப்பதில் சிரமம், பார்வைக் குறைபாடு போன்றவை இதற்கான எச்சரிக்கை அறிகுறிகளாக இருக்கலாம். சிறு குழந்தைகளிடம் உணவு உட்கொள்வது குறைதல், சோர்வு, வளர்ச்சித் தாமதம் மற்றும் உடல் இயக்கங்களில் மாற்றம் போன்ற அறிகுறிகளும் தென்படலாம்.

இந்த நோயைக் கண்டறிய மருத்துவப் பரிசோதனைகளுடன் MRI அல்லது CT ஸ்கேன், முதுகுத் தண்டுவட திரவப் பரிசோதனை மற்றும் மூலக்கூறு பரிசோதனைகள் மேற்கொள்ளப்படலாம். மேலும், மருந்துகளுக்கு எதிர்ப்புத் திறன் கொண்ட காசநோயாக இருந்தால், அதற்கேற்ற சிகிச்சையைத் தேர்வு செய்வது அவசியம்.

மூளை காசநோய் காரணமாக வலிப்பு, மூளையில் நீர் தேங்குதல், நரம்புப் பாதிப்பு மற்றும் கற்றல் திறன், உடல் இயக்கம், வளர்ச்சி ஆகியவற்றில் பாதிப்புகள் ஏற்படலாம். எனவே, குழந்தைகளுக்கு அறிகுறிகள் தென்பட்டால் உடனடியாக மருத்துவ ஆலோசனை பெற வேண்டும். குழந்தைகளின் நரம்பியல் செயல்பாடுகளையும் எதிர்கால வளர்ச்சியையும் பாதுகாக்க ஆரம்பகாலக் கண்டறிதலும் முறையான சிகிச்சையும் முக்கியம் என மருத்துவ நிபுணர் வலியுறுத்தியுள்ளார்.