ரூ.100 கோடி லஞ்ச வழக்கு – அன்பில் மகேஷுக்கு 3 நாட்கள் போலீஸ் காவல்!

தனியார் பள்ளிகளுக்கு நிரந்தர அங்கீகாரம் மற்றும் பல்வேறு அரசு அனுமதிகளைப் பெற்றுத் தருவதாகக் கூறி ரூ.100 கோடிக்கும் மேல் பணம் வசூலித்ததாக எழுந்த புகாரில், திமுக முன்னாள் பள்ளிக்கல்வித்துறை அமைச்சர் அன்பில் மகேஷ் கைது செய்யப்பட்டார்.

இந்த வழக்கு தொடர்பாக அன்பில் மகேஷை கடந்த அக்டோபர் 26ஆம் தேதி சென்னை மத்திய குற்றப்பிரிவு போலீசார் கைது செய்தனர். இதையடுத்து அவர் நீதிமன்ற உத்தரவின்படி புழல் சிறையில் அடைக்கப்பட்டார்.

இந்நிலையில், இந்த வழக்கில் பணப் பரிவர்த்தனைகள், சொத்து விவரங்கள் மற்றும் முறைகேட்டில் தொடர்புடையவர்களைக் கண்டறிய அன்பில் மகேஷை 5 நாட்கள் போலீஸ் காவலில் எடுத்து விசாரிக்க மத்திய குற்றப்பிரிவு போலீசார் நீதிமன்றத்தில் மனு தாக்கல் செய்தனர்.

இந்த மனுவை விசாரித்த ஊழல் தடுப்பு சிறப்பு நீதிமன்றம், அன்பில் மகேஷை நவம்பர் 4ஆம் தேதி வரை 3 நாட்கள் போலீஸ் காவலில் வைத்து விசாரிக்க அனுமதி வழங்கியுள்ளது.

மேலும், விசாரணைக்கு முன்பாக மருத்துவப் பரிசோதனை செய்யவும், நவம்பர் 4ஆம் தேதி மாலை 5 மணிக்கு மீண்டும் நீதிமன்றத்தில் ஆஜர்படுத்தவும் உத்தரவிடப்பட்டுள்ளது. விசாரணையின்போது அவருக்கு எந்தவிதமான உடல் மற்றும் மனரீதியான துன்புறுத்தல்களும் அளிக்கக்கூடாது என்றும் நீதிமன்றம் அறிவுறுத்தியுள்ளது.