மேகதாது அணை கட்ட கர்நாடகாவுக்கு அனுமதி இல்லை! 2029-க்குள் 10 GW மின்சார சேமிப்பு இலக்கு!
Sakthibhavaniselvaraj
· 1 min read

கர்நாடக அரசு காவிரி ஆற்றின் குறுக்கே மேகதாது அணை கட்டும் திட்டத்திற்கு தமிழ்நாடு அரசு தொடர்ந்து எதிர்ப்பு தெரிவித்து வருகிறது. இந்நிலையில், மேகதாது அணை விவகாரத்தில் கர்நாடகாவுக்கு மீண்டும் எச்சரிக்கை விடுத்துள்ள தமிழக அமைச்சர் சி.டி.ஆர். நிர்மல் குமார், அணை கட்டுவதற்கு ஒரு செங்கல்லைக் கூட வைக்க அனுமதிக்க மாட்டோம் என்று தெரிவித்துள்ளார்.
தூத்துக்குடி அனல்மின் நிலையத்தில் சீரமைக்கப்பட்ட முதல் மின் உற்பத்திப் பிரிவின் சோதனை ஓட்டத்தைத் தொடங்கி வைத்த பின்னர் செய்தியாளர்களிடம் பேசிய அவர், மேகதாது அணை விவகாரத்தில் தமிழக அரசின் நிலைப்பாடு மாறவில்லை என்று குறிப்பிட்டார். இந்த விவகாரம் தொடர்பாக தேசிய பசுமைத் தீர்ப்பாயம் மற்றும் உச்சநீதிமன்றத்தை தமிழக அரசு அணுகியுள்ளதாகவும், மத்திய அரசு அணை கட்டுவதற்கு அனுமதி வழங்காது என நம்புவதாகவும் தெரிவித்தார்.
இதற்கிடையே, தமிழகத்தில் புதுப்பிக்கத்தக்க எரிசக்தியை அதிகரிக்கும் நோக்கில் 2029-ஆம் ஆண்டுக்குள் 10 ஜிகாவாட் (GW) பேட்டரி மின்சார சேமிப்புத் திறனை உருவாக்க இலக்கு நிர்ணயிக்கப்பட்டுள்ளது.
பகல் நேரங்களில் சூரிய மின்சக்தி மூலம் கிடைக்கும் உபரி மின்சாரத்தை பேட்டரிகளில் சேமித்து, இரவு நேரங்களில் அதிக மின்சாரத் தேவை ஏற்படும்போது பயன்படுத்துவதே இதன் முக்கிய நோக்கமாகும். இதற்காக 1,000 மெகாவாட்டுக்கும் அதிகமான திறன் கொண்ட பேட்டரி சேமிப்புத் திட்டங்களுக்கான விண்ணப்பங்கள் பெறப்பட்டுள்ளன.
மேலும், புதிய சூரிய மின்சக்தித் திட்டங்களில் உற்பத்தியாகும் மின்சாரத்தில் 10 சதவீதத்தை பேட்டரிகளில் சேமிக்கும் வகையிலும் நடவடிக்கை எடுக்கப்பட்டு வருகிறது.




