ரஷ்யாவில் தடுப்பு முகாமில் சிக்கிய மதுரை மருத்துவ மாணவி தாயகம் திரும்பினார்!

ரஷ்யாவில் விசா காலம் முடிந்ததால் தடுப்பு முகாமில் சிக்கித் தவித்த மதுரையைச் சேர்ந்த மருத்துவ மாணவி டெய்சி ஆஷா மோரேஸ், சுமார் 10 நாட்களுக்குப் பிறகு பத்திரமாகத் தாயகம் திரும்பியுள்ளார். மதுரை நாடாளுமன்ற உறுப்பினர் சு. வெங்கடேசனின் தலையீட்டைத் தொடர்ந்து அவர் நவம்பர் 1ஆம் தேதி மதுரை வந்தடைந்தார்.

ரஷ்யாவின் தெற்கு உரால் மாநில மருத்துவப் பல்கலைக்கழகத்தில் நான்காம் ஆண்டு மருத்துவப் படிப்பு பயின்று வரும் டெய்சி, மருத்துவக் காரணங்களுக்காக இந்தியா திரும்பத் திட்டமிட்டிருந்தார். இதற்காக விசா காலம் முடிவடைவதற்கு முன்பே விமானப் பயணச்சீட்டைப் பதிவு செய்திருந்தார்.

ஆனால், ரஷ்யா – உக்ரைன் போர் பதற்றம் காரணமாக ஏற்பட்ட ட்ரோன் தாக்குதல்களால் ரஷ்யாவின் உள்நாட்டு விமானச் சேவைகள் ரத்து செய்யப்பட்டன. இதனால் அவர் செல்ல வேண்டிய விமானமும் ரத்தானது. மாற்று விமானம் கிடைக்காத நிலையில், விசா காலம் முடிந்ததால் ரஷ்ய குடியேற்றத்துறை அதிகாரிகள் அவரைத் தடுப்பு முகாமில் தங்க வைத்தனர்.

இதையடுத்து மாணவியின் தந்தை மதுரை எம்.பி. சு. வெங்கடேசனிடம் உதவி கோரினார். அவர் வெளியுறவுத்துறை அமைச்சகம் மற்றும் இந்தியத் தூதரக அதிகாரிகளுடன் தொடர்புகொண்டு மாணவியை விரைவாகத் தாயகம் அழைத்து வர நடவடிக்கை மேற்கொண்டார்.

இதற்கிடையே, இந்தியத் தூதரகம் உரிய நேரத்தில் உதவவில்லை என மாணவியின் பெற்றோர் குற்றம்சாட்டியுள்ளனர். மேலும், இதுபோன்ற சம்பவங்கள் வெளிநாடுகளில் கல்வி பயிலும் இந்திய மாணவர்களுக்கு மீண்டும் ஏற்படாமல் இருக்க உரிய நடவடிக்கை எடுக்க வேண்டும் என்ற கோரிக்கையும் எழுந்துள்ளது.