புயல் முன்னெச்சரிக்கை நடவடிக்கை: ஆந்திராவில் 3,100 கர்ப்பிணிகள் மருத்துவமனைகளுக்கு மாற்றம்!

ஆந்திரப் பிரதேசத்தில் புயல் முன்னெச்சரிக்கை நடவடிக்கையாக 3,100 கர்ப்பிணிப் பெண்கள் பாதுகாப்பாக மருத்துவமனைகளுக்கு மாற்றப்பட்டுள்ளனர். இவர்களில் 367 பெண்களுக்கு குழந்தைகள் பிறந்துள்ளதாக மாநில சுகாதாரத் துறை தெரிவித்துள்ளது.

அக்டோபர் 29ஆம் தேதி வெளியிடப்பட்ட சுகாதாரத் துறை அறிக்கையின்படி, பிரசவத்துக்கு இன்னும் இரண்டு வாரங்களுக்குள் இருந்தவர்கள் மற்றும் அதிக ஆபத்துள்ள கர்ப்பிணிகள் என மொத்தம் 4,228 பேர் அடையாளம் காணப்பட்டனர். அவர்களில் 3,100 பேர் அருகிலுள்ள அரசு மற்றும் தனியார் மருத்துவமனைகளுக்கு மாற்றப்பட்டனர்.

இவர்களில் 690 பேர் ஆரம்ப சுகாதார நிலையங்களுக்கும், 430 பேர் சமூக சுகாதார மையங்களுக்கும், 442 பேர் வட்டார மருத்துவமனைகளுக்கும், 456 பேர் அரசு மருத்துவக் கல்லூரி மருத்துவமனைகளுக்கும், 762 பேர் தனியார் மருத்துவமனைகளுக்கும் அனுப்பப்பட்டனர்.

மேலும், அவசர மருத்துவ உதவிக்காக 485 ஆம்புலன்ஸ்களும், 196 தாய்-சேய் போக்குவரத்து வாகனங்களும் தயார் நிலையில் வைக்கப்பட்டன. 549 நடமாடும் மருத்துவப் பிரிவுகளும் பணியில் ஈடுபடுத்தப்பட்டன. புயலால் பாதிக்கப்பட்ட பகுதிகளில் 50 மருத்துவ முகாம்களும் நடத்தப்பட்டன.

இதற்கிடையே, புயல் பாதிப்பால் மாநிலத்தில் 64 அரசு மருத்துவமனைகளின் கட்டிடங்கள் மற்றும் உள்கட்டமைப்புகள் சேதமடைந்துள்ளதாகவும் தெரிவிக்கப்பட்டுள்ளது. புயல் காலத்திலும் கர்ப்பிணிகளுக்கும் பொதுமக்களுக்கும் மருத்துவச் சேவைகள் தடையின்றி கிடைப்பதை உறுதி செய்ய நடவடிக்கைகள் மேற்கொள்ளப்பட்டுள்ளன.