ரஷ்யாவின் பிரபல சுயாதீன நாளிதழ் அலுவலகத்தை மூட முடிவு!

ரஷ்யாவின் பிரபலமான சுயாதீன நாளிதழான ‘நோவயா கசெட்டா’ (Novaya Gazeta), தனது மாஸ்கோ அலுவலகத்தை வரும் நவம்பர் 9-ம் தேதி மூட உள்ளதாக அறிவித்துள்ளது. ரஷ்ய அரசின் தொடர் அழுத்தங்கள் மற்றும் பல்வேறு கட்டுப்பாடுகள் காரணமாகத் தொடர்ந்து செயல்பட முடியாத நிலை ஏற்பட்டுள்ளதாக அந்த நாளிதழின் நிர்வாகம் தெரிவித்துள்ளது.

கடந்த 1993-ம் ஆண்டு தொடங்கப்பட்ட இந்த நாளிதழ், ரஷ்ய அரசின் கொள்கைகள், அரசியல் நடவடிக்கைகள், ஊழல் மற்றும் மனித உரிமை மீறல்கள் தொடர்பாகத் தொடர்ந்து புலனாய்வுச் செய்திகளை வெளியிட்டு வந்தது. இதனால் ரஷ்யாவின் முக்கியமான சுயாதீன ஊடகங்களில் ஒன்றாகக் கருதப்பட்டது.

குறிப்பாக, உக்ரைன் மீதான ரஷ்யாவின் போர் தொடங்கிய 2022-ம் ஆண்டுக்குப் பிறகு இந்த நாளிதழுக்குப் பல்வேறு நெருக்கடிகள் ஏற்பட்டன. அப்போது ரஷ்யாவில் அதன் அச்சுப் பதிப்பு நிறுத்தப்பட்டது. பின்னர் அதன் ஊடக உரிமம் ரத்து செய்யப்பட்டதுடன், இணையதளத்திற்கும் கட்டுப்பாடுகள் விதிக்கப்பட்டன.

மேலும், நாளிதழின் அலுவலகத்தை காலி செய்யுமாறு அறிவிக்கப்பட்டதுடன், வாசகர்களிடமிருந்து நிதி பெறுவதற்கான நன்கொடை வசதியும் முடக்கப்பட்டுள்ளது. இதனால் பொருளாதார ரீதியாகவும் பல்வேறு சிக்கல்களைச் சந்தித்துள்ளது.

இதனைத் தொடர்ந்து, நவம்பர் 9-ம் தேதி அலுவலகத்தை மூடி, இணையதளச் சேவையையும் நிறுத்த உள்ளதாக நாளிதழ் அறிவித்துள்ளது. 30 ஆண்டுகளுக்கும் மேலாகச் செயல்பட்டு வந்த ஒரு முக்கியமான ஊடகத்தின் முடிவு சர்வதேச அளவில் கவனத்தைப் பெற்றுள்ளது