கடலூரில் கோழிப் பண்ணையில் H5N1 பறவைக் காய்ச்சல் உறுதி – 35 ஆயிரத்திற்கும் மேற்பட்ட கோழிகள் உ*ரிழப்பு!
Sakthibhavaniselvaraj
· 1 min read

கடலூர் மாவட்டத்தில் உள்ள கோழிப் பண்ணையில் H5N1 வகை பறவைக் காய்ச்சல் பாதிப்பு உறுதி செய்யப்பட்டுள்ளது பெரும் அதிர்ச்சியை ஏற்படுத்தியுள்ளது. குறிஞ்சிப்பாடி வட்டம், கிருஷ்ணாபுரம் ஊராட்சிக்கு உட்பட்ட கட்டியங்குப்பம் கிராமத்தில் இந்த நோய்த்தொற்று கண்டறியப்பட்டுள்ளதாக தமிழ்நாடு கால்நடைப் பராமரிப்புத் துறை தெரிவித்துள்ளது.
கடந்த அக்டோபர் 30-ம் தேதி முதல் தியாகவல்லி ஊராட்சிப் பகுதியில் உள்ள கோழிப் பண்ணைகளில் கோழிகள் திடீரென உ*ரிழக்கத் தொடங்கியுள்ளன. இதுவரை மொத்தம் 35,647 கோழிகள் உ*ரிழந்துள்ளதாக தெரிவிக்கப்பட்டுள்ளது. இதையடுத்து உ*ரிழந்த கோழிகளின் மாதிரிகள் நாமக்கல் கோழி நோய் கண்டறியும் ஆய்வகத்தில் பரிசோதிக்கப்பட்டன. தொடர்ந்து நவம்பர் 5-ம் தேதி போபாலில் உள்ள தேசிய உயர் பாதுகாப்பு விலங்கு நோய்கள் நிறுவனத்திற்கு (ICAR-NIHSAD) மாதிரிகள் அனுப்பப்பட்டன. அங்கு நடத்தப்பட்ட ஆய்வில் H5N1 பறவைக் காய்ச்சல் பாதிப்பு உறுதி செய்யப்பட்டது.
இதனைத் தொடர்ந்து நோய்த்தொற்று பரவுவதைத் தடுக்கும் வகையில், பாதிக்கப்பட்ட கோழிப் பண்ணை மற்றும் அதைச் சுற்றியுள்ள ஒரு கிலோமீட்டர் சுற்றளவில் உள்ள கோழிகளை அழிக்கும் நடவடிக்கை மேற்கொள்ளப்பட்டுள்ளது. முதற்கட்டமாக 1,550 கோழிகள் அழிக்கப்பட்டுள்ளன. உ*ரிழந்த பறவைகள் பாதுகாப்பான முறையில் புதைக்கப்பட்டு, பண்ணைகளில் கிருமிநாசினி தெளிக்கும் பணிகளும் நடைபெற்று வருகின்றன.
மேலும், பாதிக்கப்பட்ட பகுதிகளில் பறவைகளின் நடமாட்டத்திற்கும் கட்டுப்பாடுகள் விதிக்கப்பட்டுள்ளன. தற்போது இந்தத் தொற்று கடலூர் மாவட்டத்தின் குறிப்பிட்ட பகுதியில் மட்டுமே கண்டறியப்பட்டுள்ளதால் பொதுமக்கள் அச்சப்படத் தேவையில்லை என்றும், அசாதாரணமாக பறவைகள் உயிரிழந்தால் உடனடியாக அருகிலுள்ள கால்நடை மருத்துவமனைக்குத் தகவல் தெரிவிக்க வேண்டும் என்றும் அரசு அறிவுறுத்தியுள்ளது.












