சமரச மன்றங்களுக்கு சிறப்புப் பயிற்சி, அங்கீகாரம் அவசியம்! நீதிபதி ஆனந்த் வெங்கடேஷ் வலியுறுத்தல்
Sakthibhavaniselvaraj
· 1 min read

சென்னையில் நடைபெற்ற ஆன்லைன் சமரசம் மற்றும் நிறுவன ரீதியான நடுவர் தீர்வு தொடர்பான மாநாட்டில், சமரச மன்றங்களில் பணியாற்றுபவர்களுக்கு சிறப்புப் பயிற்சியும், முறையான அங்கீகாரமும் வழங்கப்பட வேண்டும் என சென்னை உயர் நீதிமன்ற நீதிபதி என்.ஆனந்த் வெங்கடேஷ் வலியுறுத்தியுள்ளார்.
வழக்குகளைத் தீர்ப்பதில் சமரச மன்றங்கள் முக்கிய பங்கு வகிக்கின்றன. குறிப்பாக வங்கிகள் மற்றும் வங்கி சாரா நிதி நிறுவனங்கள் தொடர்பான பிரச்சினைகள், வாகனங்கள் மற்றும் இயந்திரங்கள் கடன் தவணை செலுத்தாததால் பறிமுதல் செய்யப்படும் விவகாரங்கள் உள்ளிட்டவை இம்மன்றங்களில் அதிகம் கையாளப்படுகின்றன.
ஆனால், இத்தகைய வழக்குகளை கையாளும் நடுவர்களுக்கு உரிய திறன், பயிற்சி மற்றும் தகுதி இருப்பதை உறுதி செய்வதற்கான அமைப்பு அவசியம் என நீதிபதி தெரிவித்துள்ளார்.
மேலும், ஓய்வுபெற்ற நீதிபதிகள் மட்டுமே அனைத்து நடுவர் தீர்வு வழக்குகளுக்கும் தகுதியானவர்கள் என கருத முடியாது என்றும், நடுவர்களின் திறமை மற்றும் நேர்மையை உறுதிப்படுத்தும் வகையில் நீதிமன்றங்களின் அங்கீகாரத்துடன் தகுதியான நபர்கள் அடங்கிய குழு உருவாக்கப்பட வேண்டும் என்றும் அவர் குறிப்பிட்டுள்ளார்.
நடுவர் நியமனம் தொடர்பாக ஒப்பந்தங்களில் ஒருதலைப்பட்சமாக நியமிக்கப்படும் நடைமுறையை எதிர்த்து வழக்குகள் தொடரப்படுவதும், நீதிமன்ற இடைக்கால உத்தரவுகளால் சில வழக்குகள் தாமதமடைவதும் சுட்டிக்காட்டப்பட்டது.
இதனால், முறையான பயிற்சி, தரநிலைகள், தகுதி சரிபார்ப்பு மற்றும் குறைதீர் நடைமுறைகள் கொண்ட வலுவான சமரசத் தீர்வு அமைப்பு உருவாக்கப்பட வேண்டும் என மாநாட்டில் வலியுறுத்தப்பட்டது.












