அமிதாப் பச்சன், அபிஷேக் பச்சனுக்கு கொ** மிரட்டல்.. 200 பேர் தயாராக இருப்பதாக கேங்ஸ்டர் கோல்டி தில்லான் எச்சரிக்கை!
Sakthibhavaniselvaraj
· 1 min read

பாலிவுட் திரையுலகின் முன்னணி நடிகரான அமிதாப் பச்சன் மற்றும் அவரது மகன் அபிஷேக் பச்சனுக்கு கேங்ஸ்டர் கோல்டி தில்லான் சமூக வலைதளத்தில் கொ** மிரட்டல் விடுத்துள்ள சம்பவம் பரபரப்பை ஏற்படுத்தியுள்ளது.
கோல்டி தில்லான் தனது சமூக வலைதளப் பதிவில், மும்பையில் டெல்லி காவல்துறையின் சிறப்புப் பிரிவினர் தனது கூட்டாளிகளான விகாஸ் தாக்கூர் மற்றும் தீபக் சிங் ஆகிய இருவரையும் கைது செய்துள்ளதாக குறிப்பிட்டுள்ளார். இருப்பினும், அவர்களது கைது தங்களது திட்டங்களைத் தடுக்காது என்றும், மும்பையில் சுமார் 200 கூட்டாளிகள் தயாராக இருப்பதாகவும் அவர் கூறியுள்ளார்.
மேலும், 1984-ம் ஆண்டு சீக்கியர்களுக்கு எதிரான கலவரத்தையும் தனது பதிவில் குறிப்பிட்டுள்ள கோல்டி தில்லான், சீக்கிய சமூகத்திற்கு எதிராகப் பேசுபவர்கள் உலகின் எந்தப் பகுதியில் இருந்தாலும் அவர்களுக்கு எதிராக நடவடிக்கை எடுக்கப்படும் என மிரட்டல் விடுத்துள்ளார்.
குறிப்பாக அமிதாப் பச்சன் மற்றும் அபிஷேக் பச்சன் ஆகியோரின் பெயர்களைக் குறிப்பிட்டு, அவர்கள் எத்தகைய பாதுகாப்பு ஏற்பாடுகளைச் செய்தாலும் துப்பா*கியால் சுடப்படுவார்கள் என்றும், குண்டு துளைக்காத கண்ணாடி பாதுகாப்புகூட அவர்களைக் காப்பாற்றாது என்றும் மிரட்டியுள்ளார்.
இதற்கிடையே, அமிதாப் பச்சனின் மும்பை இல்லமான ஜல்சா வீட்டின் முன்பு துப்பாக்கிச் சூடு நடத்தத் திட்டமிட்டதாகச் சந்தேகிக்கப்படும் லாரன்ஸ் பிஷ்னோய் கும்பலுடன் தொடர்புடைய இரண்டு நபர்களை டெல்லி காவல்துறையின் சிறப்புப் பிரிவினர் சமீபத்தில் கைது செய்துள்ளனர்.
மேலும், கடந்த ஒரு மாதத்தில் அமிதாப் பச்சனின் வீட்டிற்கு வெடிகுண்டு மிரட்டல் தொடர்பாக மூன்று மின்னஞ்சல்கள் வந்துள்ளதாகவும் தகவல் வெளியாகியுள்ளது. இதனால் அவரது வீட்டின் பாதுகாப்பு அதிகரிக்கப்பட்டுள்ளது.












