பில்கிஸ் பானோ வழக்கு.. 2 குற்றவாளிகளுக்கு உச்சநீதிமன்றம் ஜாமீன்.. எதிர்த்து மேல்முறையீடு செய்யும் பில்கிஸ் பானோ!
Sakthibhavaniselvaraj
· 1 min read

கடந்த 2002ஆம் ஆண்டு குஜராத் கலவரத்தின்போது பில்கிஸ் பானோ என்ற பெண் கூட்டு பாலியல் வன்கொடுமைக்கு ஆளாக்கப்பட்டதுடன், அவரது குடும்பத்தைச் சேர்ந்த 7 பேர் கொல*லப்பட்ட சம்பவம் நாடு முழுவதும் பெரும் அதிர்ச்சியை ஏற்படுத்தியது. அப்போது 5 மாத கர்ப்பிணியாக இருந்த பில்கிஸ் பானோவின் 3 வயது மகளும் உயிரிழந்தார்.
இந்த வழக்கில் குற்றம் நிரூபிக்கப்பட்ட 11 பேருக்கும் ஆயுள் தண்டனை விதிக்கப்பட்டது. இதற்கிடையே, கடந்த 2022ஆம் ஆண்டு ஆகஸ்ட் 15ஆம் தேதி குஜராத் அரசு இவர்களுக்கு முன்கூட்டியே விடுதலை (Remission) வழங்கியது. இதனை எதிர்த்து பில்கிஸ் பானோ உச்சநீதிமன்றத்தில் வழக்கு தொடர்ந்தார்.
இதையடுத்து, 2024ஆம் ஆண்டு ஜனவரி 8ஆம் தேதி 11 பேருக்கும் வழங்கப்பட்ட விடுதலை உத்தரவை உச்சநீதிமன்றம் ரத்து செய்தது. மேலும், அனைவரும் மீண்டும் சிறைக்குத் திரும்ப உத்தரவிட்டது.
இந்நிலையில், இந்த வழக்கில் தண்டனை பெற்ற பிபின்சந்திர கனையாலால் ஜோஷி மற்றும் பிரதீப் ராமன்லால் மோதியா ஆகிய இருவர் தங்களது தண்டனையை எதிர்த்து உச்சநீதிமன்றத்தில் மேல்முறையீடு செய்தனர்.
இதனை விசாரித்த நீதிபதிகள் எம்.எம். சுந்தரேஷ் மற்றும் பிரசன்னா பி. வரலே அடங்கிய அமர்வு, இருவரும் 17 ஆண்டுகளுக்கும் மேலாகச் சிறையில் இருந்ததையும், அவர்களில் ஒருவர் கடுமையான உடல் ஊனத்தால் பாதிக்கப்பட்டிருப்பதையும் கருத்தில் கொண்டு, ஆயுள் தண்டனையைத் தற்காலிகமாக நிறுத்தி ஜாமீன் வழங்க உத்தரவிட்டது.
இந்த உத்தரவுக்கு எதிர்ப்பு தெரிவித்துள்ள பில்கிஸ் பானோ, தன்னிடம் எந்தக் கருத்தும் கேட்காமல் நீதிமன்றம் இந்த முடிவை எடுத்துள்ளதாகக் கூறியுள்ளார். மேலும், இந்த உத்தரவை எதிர்த்து மேல்முறையீடு செய்யப்போவதாகவும் தெரிவித்துள்ளார்.
ஏற்கனவே ஒருமுறை நீதிக்காகப் போராடிய நிலையில், தற்போது மீண்டும் நீதிக்காகப் போராட வேண்டிய சூழல் ஏற்பட்டுள்ளதாகவும் அவர் வேதனை தெரிவித்துள்ளார்.












