ஆந்திராவில் முரசு புயல் பாதிப்பு – 30,661 ஏக்கர் பயிர்கள் சேதம்!

ஆந்திரப் பிரதேசத்தில் கரையைக் கடந்த முரசு புயலால் 15 மாவட்டங்களில் விவசாயப் பயிர்கள் பெரும் பாதிப்பைச் சந்தித்துள்ளன. குறிப்பாக கிருஷ்ணா, பாபட்லா, நந்தியால் ஆகிய மாவட்டங்களில் அதிகளவில் பயிர்கள் சேதமடைந்துள்ளதாக அதிகாரிகள் தெரிவித்துள்ளனர். நெல், பருத்தி, மக்காச்சோளம் உள்ளிட்ட பயிர்கள் அதிகம் பாதிக்கப்பட்டுள்ளன.

முதற்கட்ட அதிகாரப்பூர்வ மதிப்பீட்டின்படி, மொத்தம் 30,661 ஏக்கர் பயிர்கள் சேதமடைந்துள்ளன. புயலின் தாக்கம் 15 மாவட்டங்களில் உள்ள 132 மண்டலங்களில் உணரப்பட்டுள்ளது. இதனால் பாதிக்கப்பட்ட பகுதிகளில் வசித்த 10,805 பேர் பாதுகாப்பாக வெளியேற்றப்பட்டு நிவாரண முகாம்களில் தங்க வைக்கப்பட்டுள்ளனர்.

பாதிக்கப்பட்ட மக்களுக்காக மொத்தம் 171 நிவாரண முகாம்கள் அமைக்கப்பட்டு, 14,810 உணவுப் பொட்டலங்கள் விநியோகிக்கப்பட்டுள்ளன. மீட்பு மற்றும் நிவாரணப் பணிகளுக்காக 11 தேசிய பேரிடர் மீட்புப் படைக் குழுக்களும், 13 மாநில பேரிடர் மீட்புப் படைக் குழுக்களும் களமிறக்கப்பட்டுள்ளன. மேலும், விழுந்த மரங்கள் மற்றும் தேங்கிய மழைநீரை அகற்ற தீயணைப்புத் துறையின் 185 குழுக்கள் பணியில் ஈடுபடுத்தப்பட்டுள்ளன.

முன்னெச்சரிக்கை நடவடிக்கையாக 3,066 கர்ப்பிணிப் பெண்களும், 1,008 பாலூட்டும் தாய்மார்களும் மருத்துவமனைகளுக்கு மாற்றப்பட்டுள்ளனர். 13 மாவட்டங்களில் 725 மருத்துவக் குழுக்கள் பணியில் ஈடுபடுத்தப்பட்டுள்ளன. அவசரத் தேவைக்காக 362 ஆம்புலன்ஸ்களும் தயார் நிலையில் வைக்கப்பட்டுள்ளன.

புயலால் பாதிக்கப்பட்ட பகுதிகளில் மக்களுக்கு தேவையான நிவாரண உதவிகளை வழங்கவும், மீட்புப் பணிகளைத் தொடர்ந்து மேற்கொள்ளவும் ஆந்திர அரசு நடவடிக்கை எடுத்து வருகிறது