ஹைதராபாத்தில் 35 கி.மீ. தூரத்திற்கு பாட்கார் திட்டம்! 64 நிலையங்கள்.. டிரைவர் இல்லாத மின்சார வாகனங்கள்!
Sakthibhavaniselvaraj
· 1 min read

ஹைதராபாத் நகரில் அதிகரித்து வரும் போக்குவரத்து நெரிசலைக் குறைக்கவும், பொதுப் போக்குவரத்தை மேம்படுத்தவும் புதிய Personal Rapid Transit System (PRTS) திட்டத்தை அறிமுகப்படுத்தத் திட்டமிடப்பட்டுள்ளது.
இதன் முதற்கட்டமாக, குகட்பள்ளி (Kukatpally) முதல் க்னாலெட்ஜ் சிட்டி (Knowledge City) வரை சுமார் 35 கிலோமீட்டர் தூரத்திற்கு வழித்தடம் அமைக்கவும், அதில் 64 நிலையங்கள் உருவாக்கவும் திட்டமிடப்பட்டுள்ளது. இந்த வழித்தடம் ரைடுர்க் மற்றும் பயோடைவர்சிட்டி உள்ளிட்ட முக்கிய பகுதிகளை இணைக்கும் வகையில் முன்மொழியப்பட்டுள்ளது.
இந்தத் திட்டத்தில் பிரத்யேக உயர்மட்டப் பாதைகளில் சிறிய டிரைவர் இல்லாத மின்சார பாட்கார்கள் இயக்கப்படும். பயணிகள் தாங்கள் செல்ல வேண்டிய இடத்தைத் தேர்வு செய்து, அந்த இடத்திற்கு நேரடியாகச் செல்லும் வாகனத்தில் பயணிக்கலாம். இதனால் இடையில் உள்ள அனைத்து நிலையங்களிலும் நின்று செல்ல வேண்டிய அவசியம் இருக்காது.
ஹைதராபாத் மெட்ரோ ரயில் நிறுவன அதிகாரிகள் இந்தத் திட்டம் தொடர்பான வரைபடம் மற்றும் முன்மொழிவுகளை அரசிடம் சமர்ப்பித்துள்ளனர். இதனை ஆய்வு செய்த மாநில தலைமைச் செயலாளர் சஞ்சய் ஜாஜு, அதிக மக்கள் பயணிக்கும் பகுதிகளைக் கண்டறிந்து, ஏற்கெனவே உள்ள போக்குவரத்து வசதிகளுடன் இந்தத் திட்டத்தை இணைக்கவும், குறைந்த செலவில் செயல்படுத்தவும் அதிகாரிகளுக்கு அறிவுறுத்தியுள்ளார்.
மேலும், மெட்ரோ ரயில், பேருந்து உள்ளிட்ட பொதுப் போக்குவரத்து வசதிகளுடன் இந்த பாட்கார் திட்டத்தை இணைத்து, பயணிகளுக்கு எளிதான போக்குவரத்து வசதியை ஏற்படுத்த நடவடிக்கை எடுக்கப்பட்டு வருகிறது.
இந்தத் திட்டம் நடைமுறைக்கு வந்தால், ஹைதராபாத்தின் முக்கிய IT மற்றும் வணிகப் பகுதிகளுக்குச் செல்வது எளிதாகும் என எதிர்பார்க்கப்படுகிறது. தற்போது இந்தத் திட்டம் முன்மொழிவு மற்றும் திட்டமிடல் கட்டத்தில் உள்ளது.












