மும்பையில் சச்சின் டெண்டுல்கருடன் கிரிக்கெட் விளையாடிய பிரிட்டன் இளவரசர் வில்லியம், இளவரசி கேட்!
Sakthibhavaniselvaraj
· 1 min read

பிரிட்டன் இளவரசர் வில்லியம் மற்றும் அவரது மனைவி இளவரசி கேட் ஆகியோர் மும்பையில் இந்திய கிரிக்கெட் ஜாம்பவான் சச்சின் டெண்டுல்கருடன் இணைந்து தெரு கிரிக்கெட் விளையாடிய நிகழ்வு கவனம் பெற்றுள்ளது.
மூன்று நாள் அரசுமுறைப் பயணமாக இந்தியா வந்துள்ள இளவரசர் வில்லியம் மற்றும் இளவரசி கேட், தங்களது முதல் நாள் பயணத்தை மும்பையில் தொடங்கினர். இதன் ஒரு பகுதியாக தெற்கு மும்பையில் உள்ள பல்லார்ட் எஸ்டேட் பகுதியில் உள்ளூர் பள்ளி மாணவர்களுடன் இணைந்து கிரிக்கெட் விளையாடினர்.

இந்த நிகழ்வில் முன்னாள் இந்திய கிரிக்கெட் வீரர் சச்சின் டெண்டுல்கரும் பங்கேற்றார். இளவரசர் வில்லியம் பேட்டிங் மற்றும் பந்துவீச்சில் ஈடுபட்டார். அதேபோல் இளவரசி கேட் பேட்டிங் செய்து தனது கிரிக்கெட் திறமையையும் வெளிப்படுத்தினார். சச்சின் டெண்டுல்கர் இருவருக்கும் கிரிக்கெட் விளையாட்டின் நுணுக்கங்களை விளக்கினார்.
கடந்த 2016ஆம் ஆண்டு இந்தியா வந்தபோதும் இந்த அரச தம்பதியினர் சச்சின் டெண்டுல்கருடன் இணைந்து கிரிக்கெட் விளையாடியிருந்தனர். தற்போது 10 ஆண்டுகளுக்குப் பிறகு மீண்டும் அவரைச் சந்தித்து கிரிக்கெட் விளையாடியது குறிப்பிடத்தக்கது.
மேலும், இந்த நிகழ்வைத் தொடர்ந்து இருவரும் மும்பையின் பாரம்பரிய மண் குவளையில் வழங்கப்படும் தேநீரை ரசித்தனர். சுற்றுச்சூழல் பாதுகாப்பு தொடர்பான எர்த்ஷாட் (Earthshot Prize) விருது விழாவில் பங்கேற்பதற்காக இந்தியா வந்துள்ள இவர்கள், தொடர்ந்து பல்வேறு நிகழ்ச்சிகளில் கலந்துகொள்ள உள்ளனர். நவம்பர் 18ஆம் தேதி டெல்லியில் பிரதமர் நரேந்திர மோடியையும் சந்திக்கத் திட்டமிட்டுள்ளனர்.













