தொடர்ந்து 2-வது இறுதிப்போட்டிக்கு முன்னேறிய லக்ஷயா சென்!
Sakthibhavaniselvaraj
· 1 min read

ஜப்பானில் நடைபெற்று வரும் குமாமோட்டோ மாஸ்டர்ஸ் பேட்மிண்டன் தொடரில் இந்திய வீரர் லக்ஷயா சென் தொடர்ந்து இரண்டாவது முறையாக இறுதிப்போட்டிக்கு முன்னேறியுள்ளார்.
ஆடவர் ஒற்றையர் பிரிவு அரையிறுதிப் போட்டியில் உலகத் தரவரிசையில் 10-வது இடத்தில் உள்ள இந்தோனேசிய வீரர் அலுவி ஃபர்ஹானை எதிர்கொண்டார். விறுவிறுப்பாக நடைபெற்ற இந்தப் போட்டியில் லக்ஷயா சென் 21-12, 15-21, 21-11 என்ற செட் கணக்கில் வெற்றி பெற்றார். சுமார் 70 நிமிடங்கள் நடைபெற்ற இந்த ஆட்டத்தில் முதல் செட்டை எளிதாகக் கைப்பற்றிய லக்ஷயா, இரண்டாவது செட்டில் தோல்வியடைந்தார். இருப்பினும் மூன்றாவது செட்டில் அதிரடியாக விளையாடி வெற்றியை உறுதி செய்தார்.
இதற்கு முன்பு அலுவி ஃபர்ஹானை எதிர்கொண்ட இரண்டு போட்டிகளிலும் லக்ஷயா சென் தோல்வியடைந்திருந்தார். தற்போது அவரை வீழ்த்தி இறுதிப்போட்டிக்கு முன்னேறியிருப்பது குறிப்பிடத்தக்கது.
ஏற்கனவே இந்த மாத தொடக்கத்தில் ஜெர்மனியில் நடைபெற்ற ஹைலோ ஓபன் பேட்மிண்டன் தொடரில் சாம்பியன் பட்டம் வென்றிருந்தார். தற்போது குமாமோட்டோ மாஸ்டர்ஸ் தொடரிலும் இறுதிப்போட்டிக்கு முன்னேறி தனது சிறப்பான ஆட்டத்தைத் தொடர்ந்து வருகிறார்.
மேலும், சீனாவின் ஹாங்சோ நகரில் நடைபெறவுள்ள BWF உலக டூர் இறுதிப்போட்டிக்குத் தகுதி பெறும் வாய்ப்பையும் அவர் அதிகரித்துள்ளார். உலக டூர் தரவரிசையில் தற்போது 12-வது இடத்தில் இருக்கும் லக்ஷயா, முதல் 8 இடங்களுக்குள் முன்னேறினால் மட்டுமே இந்தத் தொடருக்குத் தகுதி பெற முடியும்.
நாளை நடைபெறவுள்ள இறுதிப்போட்டியில் தாய்லாந்தின் குன்லாவுட் விதித்சர்ன் அல்லது ஜப்பானின் கோகி வதனாபே ஆகியோரில் ஒருவரை லக்ஷயா சென் எதிர்கொள்ள உள்ளார்.












