சாண்ட்பேப்பர் சர்ச்சை.. பாட் கம்மின்ஸ் கருத்துக்கு கேள்வி எழுப்பிய வாசிம் அக்ரம்!
Sakthibhavaniselvaraj
· 1 min read

ஆஸ்திரேலிய கிரிக்கெட்டில் மீண்டும் வெடித்துள்ள பந்தை சேதப்படுத்திய விவகாரம் தொடர்பாக, பாகிஸ்தான் முன்னாள் கிரிக்கெட் வீரர் வாசிம் அக்ரம், ஆஸ்திரேலிய கேப்டன் பாட் கம்மின்ஸின் கருத்துக்கு கேள்வி எழுப்பியுள்ளார்.
கடந்த 2018ஆம் ஆண்டு தென்னாப்பிரிக்காவுக்கு எதிரான கேப் டவுன் டெஸ்ட் போட்டியின்போது, ஆஸ்திரேலிய வீரர் கேமரூன் பான்கிராஃப்ட் சாண்ட்பேப்பரைப் பயன்படுத்தி பந்தின் தன்மையை மாற்றிய சம்பவம் பெரும் சர்ச்சையை ஏற்படுத்தியது. இந்த விவகாரத்தில் அப்போதைய கேப்டன் ஸ்டீவ் ஸ்மித், துணைக் கேப்டன் டேவிட் வார்னர் மற்றும் பான்கிராஃப்ட் ஆகியோர் தண்டிக்கப்பட்டனர்.
இந்நிலையில், ஆஸ்திரேலிய அணியின் முன்னாள் தொடக்க வீரர் உஸ்மான் கவாஜா தனது சுயசரிதை புத்தகத்தில், பந்து சேதப்படுத்தும் திட்டம் குறித்து ஒட்டுமொத்த அணிக்கும் தெரிந்திருந்ததாகக் குறிப்பிட்டிருந்தார். இதனை பாட் கம்மின்ஸ் மற்றும் மிட்செல் ஸ்டார்க் மறுத்துள்ளனர். அதேசமயம், டேவிட் வார்னர் கவாஜாவின் கருத்துக்கு ஆதரவு தெரிவித்துள்ளார்.
இதுகுறித்து பேசிய வாசிம் அக்ரம், பாட் கம்மின்ஸ் தனக்கு நெருங்கிய நண்பர் என்றும், சிறந்த வீரர் மற்றும் தலைமைப் பண்புள்ளவர் என்றும் குறிப்பிட்டார். இருப்பினும், அனுபவம் வாய்ந்த பந்துவீச்சாளரால் பந்தில் ஏற்பட்டுள்ள மாற்றத்தை எளிதில் கண்டறிய முடியும் என்றார்.
மேலும், இயல்பாக பந்து தரையில் பட்டு ஏற்படும் கீறல்களுக்கும், சாண்ட்பேப்பரால் ஏற்படும் கீறல்களுக்கும் மிகப்பெரிய வித்தியாசம் இருப்பதாகத் தெரிவித்தார். பந்தை கையில் எடுத்துப் பார்க்கும்போதே ஏதோ தவறு நடந்துள்ளது என்பதை அனுபவமுள்ள பந்துவீச்சாளரால் கண்டுபிடிக்க முடியும் என்றும் கூறினார்.
இந்த விவகாரத்தில் யாருக்கும் ஆதரவாகப் பேசவில்லை என்றும், எட்டு ஆண்டுகளுக்குப் பிறகு மீண்டும் எழுந்துள்ள இந்த சர்ச்சை விரைவில் முடிவுக்கு வர வேண்டும் என்றும் வாசிம் அக்ரம் தெரிவித்துள்ளார்.












